Testimonio y Storia di e Resurekshon k’Aketio (Caquetio).

A pasa hopi luna cu mi no por trece mi mes na papia di storianan berdadero di k’Aketio (Caquetio). Loke ta nos manera nan, nos cultura, nos origen, y nos bida. Mino por expresa cu articulo loke ta spiritualidad, tradicion, y historia entre otro. Esaki ta pasobra ta imposibel pa papia di ken e k’Aketio ta den differente aspecto riba nan mes. Loke ta nos sabiduria y tradición ta bibo como un simbolo hente. Den tur honestidad, mi no por traduci e storia actual den e manera aki, tampoco den e manera mi a hacie na cuminsamento di e documentacionnan cu mi a publika riba mi pagina. Mi tabata purba, pero mi tabata trompika riba mi palabra. Mi lengua tabata bira y mino por papia, par di biaha pa bon motibo, otro biaha mi tabata limita na sigi publika y comparti e storia pasobra di e intentonan escuro pa kibra y deshaci di e resurekshon k’Aketio. Manera otro personanan indigeno, y k’Aketio a comparti e storia di nan bida cumi, inspirando mi, ami ta scohe pa comparti mi storia tambe, y con mi a reencontra tradición y storia ancestral, y e berdad.

Mi no cuminsa mi bida den e presencia di ancestronan cu a continua tradicion, aunke mi ta reconoce cu mi a nace di amor den e curason di esnan cu a dunami bida. Mi infancia y adolescencia tabata contemporario. Boutismo y bay misa tabata un punto di referencia con pa biba, papia, actua, y tene relacion cu Dios… E a bira un bril cu mi tabata bisti sin cu mi sa y ta filtra e manera cu mi ta mira mi mes, otro, y mundo… Aunke esaki tabata e caso, mi tabata tin sintimientonan y pensamentonan otro, cual mi tabata considera malo. Scol no tabata nada mihor, docente y studiante haciendo cherche di e manera cu mi tabata tuma curashi di articula mi pensamentonan aunke nan tabata otro. E sintimiento di invalidashon tabata asina immenso cu mi no a kere muchu mas den mi mes. Mi tabata wordo bisa cu mi no sa con pa pensa, cu nunka lo mi ta sufficiente sabi; actualmente kiko esey kiermen? Sabi abase di kiko? Mi tabata mira, y ainda ta mira, e mundo den un otro manera. Mihor bisa, mi tabata experiencia, y ainda experiencia, e mundo den un manera spiritual y interconnecta. Unda hende ta mira ‘One Happy Island’, mi ta mira dolor, perdida, y falta di spiritu. Educashon a siñami den kortiko di mi hendenan, pero como sifuera nan tabata caracternan pasivo sin autonomia den buki di historia skirbi pa colonisador den un idioma cu mi tabata wordo forsá pa papia, pero nunka mi a sinti un connexion cu ne. Mi mester a haci hopi cos na nan manera, den un manera mi a bira un caracter den e storia colonial. Mi a cuminsa regresa na mi mes, un revolucion rond di e centro di mi Ser, cu mi a bin na realisa ta tradicion k’Aketio. Storianan cu a wordo comparti cu mi despues di mi regreso tabata expresá e mesun berdad; cu nos tin un Ser spiritu, nos centro spiritual. 

Den mi curason mi a sinti storianan y memorianan recorda den soño, unda sabiduria ta un don, un don k’Aketio, un principio indigeno cu nos ta comparti cu pueblo y tribunan. Mino tabata den busko di e berdad. Vision y soñonan tabata persisti di mi Ser custoria, tradicion y sabiduria te ora mi a pone atencion  y ripara. Mino tabata conciente cu mi tabata bibando den e cuna di nos ancestronan, nos maneranan y storianan. Mi tabata simplemente inconcient cu e experiencianan aki di mi Ser spiritu ta tradicion injan, particularmente k’Aketio. Prome mi a yega edad di adulto, mi soñonan tabata turbulente y fastioso pa accepta. Nan tabata strobami te ora cu mi a realisa e sabiduria di soñonan kier a reconcilá mi spiritu cu tabata, y ainda den algun manera, “kibrá’. Ta mas cu un dolor mi a experiencia riba e rumbo aki den regreso na mi mes dia pa dia. No ta facil pa por splika kiko mi a mira y experiencía pero e realidad di dje a crea un imprecion riba mi cu sabiduria mi nunka a scucha cu mi oreanan. Kiko bo persona ta kere? Kiko abo ta sinti? Riba un dia cu ta significa cambio di un temporadad pa e otro, e ‘Winter’ solstice, mi a ricibi un vision cu e significacion di nos nomber, e simbolo correspondiente, y nos storia di creacion; fe unda nos a bini. Mi a mira mi curpa tattuá cu simbolonan conocido, simbolonan cu tiki persona reconoce, y simbolonan cu niun a yega di mira… ainda. Cada un tattoo tabata representa a storia di mi bida, hunto cu nos storia y henter creacion; cuminsamento, fin, y continuacion. Mi a continua mi rumbo y riba dje experiencianan paden di mi y dia pa dia tabata sincronisa y nificashon profundo tabata canta manera musica di wiri y fluit. Inspirando movemiento, baile, cu mi a bin na sa cu yama wariwari… naciendo di soño, vision y ceremonia entre e bibo y ‘morto’. Mi a ripara cu mino mester bay cualkier instituto, ni otro lugar, pa concurá cu mi ta ken mi ta, pero mi ta kere tur hende mester scohe pa nan mes, y mi a scohe esaki. Porta bo persona lo pensa, “Con Chayo sa cu e visionnan aki ta berdad?” Mi respuesta ta cu un dia cada un persona cu ta reconnectando cu nos herencia berdadero lo reencontra e voz di nan mesun Ser cu lo declara na nan ken nan ta.

Riba mi rumbo mi a encontra yiunan di mama tera di Sur America, di un patria cu nos tin un connexion fuerte den sentido di cultura y tradicion. Mi a bin na realisa den dialogo cu mi visionnan ta papia berdad, y e storianan di antes den mi soñonan ta real. Compartiendo y intercambiando storia y tradicion nos a ripara nos ta conbibi y connecta profundamente riba Tradicion y Sabiduria. Reconnectando cu ken mi ta mi ta reconnecta cu famia serka y leeuw, cu nan mes ainda tin dolor, manera ami, y cu mi tin cu rouw mi dolor. Pero, nos no sa con laga nos mes rouw. Den un manera nos ta hogando den lagrima di loke nos a perde den a chaos di colonialismo cu a invadi nos mente, curason y spirito... Nos ta den un secura, cu lagrima di creacion so por sana.  Tin hopi mi kier a comparti, pero mino a haci esaki. Actualmente, cu e recien perdidá di archivo personal entre mi persona y otro hendenan cu a contribui, mino tin palabra pa comparti cu bo, e pueblo, den a manera mi tabata comparti na promer lugar, y cu mi tabata tin intencion di sigi comparti. E yobida di awa cu a basha recien sin para ta nos lagrimanan, pero e ta un chens pa corda cu e storia a nace den nos, aunke nos por a lubida, eta un memoria cu ta regresa, den mas cu un persona den epoca aki. Mi mester a regrasa bek na mi Ser, di unda e soñonan a aparece. Mi mester regresa na mi mes cu mi soñonan indicando na mi unda mi ta para cu mi mes. Esaki ta un testimonia di mi experiencia y rumbo, mi ta comparti puntonan monumental di nos storia, tradicion y sabiduria pa asina abo pueblo por sa un gran parti di e berdad, y cu eno ta bin di niun otro caminda fuera di e Spirito Bibo… Abo, e descendiente di ancestronan cu ta descendiente di ancestronan cu ta yiu di tera.

Ken ta k’Aketio, y ken no? Un pregunta asina no ta cuadra cu sabiduria y principio di nos hendenan k’Aketio. Nos relacionnan ancestral no nada manera loke nos a custumbra aworaki pa identifica nos mes. Un proposito recien declará pa supesto lider na cabes di e k’Aketio, aunke ta yama nan mes ‘Aruban Warriors’, kier quantifica bow di nan authoridad ken ta o no ta Arubiano puru o k’Aketio, y ken merece e recompensacion di Oro hortá. Aunke, tin hopi conflicto, loke ta e inauguracion berdadera di un Datihao (lider) y Diao (lider principal) ta dificil pa traduci y illustra den kortiko henter e tradicion. Simplemente bisa, un lider tin cu sostene su mes balans entre e divino y bida mortal; e trata di delibera loke ta aspectonan fundamental di e pueblo su bida, cual ta experiencianan spiritual, social, y ‘politico’. Ta importante para keto y reflexiona; “Mi por yama mi mes un lider si mi ta xenophobico contra otro cu mas sigur ta sufriendo e consequencia di colonialismo na nan mesun tera? Contra otro cu posiblemente ta descendiente di un otro nacion indigeno? Nos por wak den spiel y mira nos curason?” Sintando cu guardanan di sabiduria, den soñonan y dia pa dia, mi a realiza cu nos ta congreashí abase di sabiduria cu ta nace di nos Ser, y no conocemiento abase di conceptonan di puridad.

Conceptonan colonial di puridad a simplemente continua den otro forma, e biaha aki e ta e busko pa classifica ken ta Arubiano “puru”, den mesun sintido cu e Europeano a buska classifica identidad di un indigeno riba e concepto di sanger “puru”. Ki nan nos por mira cu si no nos sana e trauma y indoctrinacion colonial, y djis para tras di e nomber di k’Aketio, o cualkier otro nomber, nos ta tapa y nenga di mira unda nos ta para y no por reconnecta cu nos mes. Cu e declaracion pa verifica e autenticidad di e identidad indigeno abase di un grupo di algun persona na cabes ainda ta externalisa e reconnecion cu nos Ser y herencia cultural k’Aketio. Pa daclara e regreso di oro pa bo mesun “tribu” mientras pueblo ta sufri den nan mes y sociedad di effectonan di colonialismo kiermen cu ba abandona bo mesun humanidad, norma y balor cu ta mantene nos humilde, e cordialidad di e k’Aketio.

E criticá di e proposicion aki ta no ta pa nenga e lucha di 'Aruban Warriors' como un movemiento cu ta trece atencion riba destruccion ambiental y a exemplifica autonomia den manera di 'lanta para y bisa algo'. Nan palabra tambe ta yuda nos tur bin na refleha actualmente dikon nos ta menosprecia nos naturalesa y permiti destrución. Entre otro, e topico di oro hortá ta importante y mester reconoce cu e topico aki ta un dificil pa bay papia di dje, pero nos mester tin un deliberacion interno cu nos mes. Riba e rumbo di reconnecta, nos mester bay bira den nos mes tur dos banda cu nos ta proyectá y generá pafo den nos bida di dia pa dia. Conservacion di naturalesa ta sumamente importante, pero sin bay bek y mira e programmacion colonial cu nos a hereda inconcientemente, nos lo ripiti e problema den un otro forma; na un banda ta balorá naturalesa, pero menosprecia compañero riba nos isla cu ta di otro caminda. Nos ta bay na proyectá e fuente di problema riba un otro. Mientras nos ta discrimina immigrante y culpanan pa "horta" nos trabounan, nos ta faya di mira cu nan como hende ta buskando mesun derecho di biba manera anos, y cu nos ta mantene un systema economico y dynamico social cu ta pestá cu un actitud colonial; lo nos yamanan "allochton", manera Hulanda ta haci cu nos. Esaki un ehempel di 'Lateral violence'. Nos mester corda cu e systemanan Eureopano e impone riba loke ta oro natural un balor economico abase di scarsedad. Asina cu e un principio comun, lo bira mas comun cu e `Europeano por establece caminda pa abusá di naturalesa como su fuente pa generá su fortalesa illegitimo. Prome cu esaki, nos relacion cu mama tera no tabata basá riba un scaal economico unda un cantidad di Oro tin balor den algun cantidad di papel cu su balor ta bin di e Europeo. Un papel producí na mang di esnan cu a horta oro y a establece cu segragacion entre un pueblo y e otro, generando un dynamico di superioridad y inferioridad. Nos dynamico economico prome cu Colonialismo ta encera intercambio abase di abundancia y necesidad. E presencia di e tradicion aki tabata tey te den 1950s unda den un bario un cunucero lo comparti loke e tin den abundancia, pero despues di tempo lo 'comparti' cosecha den menos cantidad o di menos calidad pasobra di scarsedad den temporada di secura y ora pobresa a cuminsa effecto cu segracion economico y desacracion di naturalesa den e persona su Ser; norma y balornan cu a mantene nos como Yiu di tera serka di cas. Nos mes refleha ki norma y balornan nos tin awor cu nos ta canando sin rumbo pa cas, y cu no tin un hogar, no tin un cas. 

Tira culpa riba e immigrante ta kita e responsibilidad di bo mes pa mira bo prejucio. No ban lubida con nos mesun yiunan di tera tin cu bai di cas pa un mihor bida pasobra di nos circumstancia economico y social. Cu nan a decidi entre e opcion di keda na un isla un tin “nada”, o bay na un isla unda tin “oportunidad”. No ta un crimen pa scohe bo mesun rumbo, pero con por scohe di curason si nos por dedici entre 2 opcion so, den un manera di bisa, pero claro eno ta asina preto y blanko. No ban lubida esnan cu mester a bay di Aruba y buska trabou otro caminda den Caribe pa por sostene nan famia. Tradicionalmente a manera cu nos ta biba cu otro ta un communion y honor pa otro. E no ta nenga e realidad cu conflicto por aparece, sino e ta unda nos por mira nos mes. No tabata tin un structura di un Lider na cabes y e pueblo ta sigi. Den cada un tribu den e nacion k’Aketio ta presente varios persona representativo di diferente aspecto den e comunidad. Nos mester para keto, reflexiona y mira unda nos ta para, kiko nos ta ripiti inconcientemente riba nos mes, y riba otro. Usando herencia k’Aketio como un titulo sin a refleha profundamente riba nos concepto y pensamentonan di identidad y nos antepasadonan nos no lo por reconnecta berdaderamente, y lo sigi falta respect na tur ancestro y descendiente cu a continua den silencio di naturalesa como Spirito Bibo, cu of sin curpa. E essencia di ken nos ta ta duna lus na nos nomber.

Pa e siguiente paragraaf mi kier pidi compredimeiento pa e gran texto cu lo culmina y revela varios berdad, pero no tur, esaki tin di aber cu nos lo mester mas espacio pa por trata cada aspecto cu amor y respet. Arquelogia, antropologia, y investagacion genetico no lo por cosecha pa nos loke soñonan intimo y personal so por declara na nos ken nos ta. E nombernan original di habitantenan indigeno cu a wordo convertí no lo bin di misanan cu a hunga un rol den caba cu e habitante k’Aketio, aunke soño y investigacion guiá pa soño ta indica cu tin documentonan di nombernan original. E berdad no lo bin di investigadornan cu ta den busko di un “connexion” entre nos ancestronan y teoria di sociedadnan antiqua y technologicamente sophistica di un epoca tras di lomba. Historiconan studia di Europa ta continua di pinta un pueblo pasivo na colonisación, considerando tambe e processo di investiga, y literatura antiqua cu lenguage y conceptonan colonial di habitante indigeno. Loke nan no lo contabo, cual nos por soña, y tambe lesa, ta e hortamento di mucha di nan Mama. Yiunan hortá, abusá y lantá como Catholico, of sino un otro denominacion Christian. Hortá y wordo hiba Europa, unda par a biba como serviente, leeuw di cas, di famia, di pueblo. Considera e curason, e dolor… cu bo ta den un mundo perdí. Lo bo no tende cu conquistador, manera Nicolas Federman entre otro, kier a probecha di e k’Aketio su cordialidad y amabilidad pa infiltra nos comunidad. Y bo tabata sa cu miembronan di diferente tribunan lo desparece y reaparece otro caminda como traductor pa e colonisador? Por ehempel, e persona ‘Golmir’ den “Historia di Alto Vista” skirbi pa Nooyen, R. H. Nan ta perde nan nomber original, wordo abusa, manipula, y menasa pa asina yuda e colonisador cu tin intento di conquista cualkier patria y comunidad indigeno.

Nan lo no contabo di chaos entre miembronan di comunidad, cu algun ta convertí pa sobrebibi, of sino wordo priminti algo falso, y e otro miembronan kier keda biba riba tereno ancestral. Den e chaos aki e Spañonan e probecha di masacra miles di k’Aketio. Tampoco lo bo tende muchu di promesa falso na Coro, Venezuela pa pas y respet cual a wordo uza pa e Spañonan pa invadi y deshaci di e k’Aketio. Nan no lo contabo con hende muher, cu dolor den nan curason, ta aborta nan yiunan cu miedo e Spañonan lo hortanan bay cu nan… y algun otro pasobra cu nan a wordo viola, y no por a sigi despues di e trauma. Nan no lo contabo cu e pastornan di e prome “scolnan” na Aruba (Bonaire, Curacao, Coro) tabata abusa di mucha, causando trauma generacion trai generacion. Y bo tabata sa cu ora e Europeonan a yega, nos kier a sinta papia cu e representante religiousio pa asina conoce ken nos a encontra? Nos kier a mira si nos por a congrega abase di sabiduria, honor, y respet. Actualmente, nan a sinta cu nos, nos a duna nan un sienta rond di nos fuente di candela. Nos a laganan articula ken nan ta cu nan mesun palabra y accion, nos no tabata primitivo y inconciente di malo. E storia ta ambos un historia cu hopi sanger y dolor, pero tambe cu truimpho di e Spirito Bibo cu a resisti. Nan no lo contabo di e bataya entre e Spañonan y k’Aketio riba terena ancestral. E nomber original di cada un sitio y nan storia no lo wordo contá. Nan no lo contabo cu nos ta un pueblo spiritual cu ta honora y biba den communion cu Creador y Creacion, ni tampoco lo nan contabo cu nan a uza nos mesun spiritualidad contra nos, transplantando nos creencia den Christianismo, pero cu nos ta un pueblo spiritual cu por regresá memoria ancestral ta keda e berdad.

Y, na mi sorpresa, ‘Dera Gai’ tambe ta un manera cu algun tradicion partikular di k’Aketio a continua hunto cu otro fuente den un fuente nobo. Cu e baile di “Dera Gai” tin un influencia k’Aketio, e movemiento ciclico ta connecta cu nos tradicion pinta den cueba y di varios tribu den Amazon honorando e Solo y temporada di Zomer na comienso di aña nobo cual den e tradicion k’Aketio ta entre juni 20 y juni 24. No ta un coincidencia cu aspectonan particular di celebra e aña nobo a wordo transplanta, pero tambe a continua den e forma ki como un resistencia keto contra colonialismo. Bo tabata sa cu ainda tin descendiente di k’Aketio ta biba na Sur America? Den nos bario.. E Amuay, cual nan nomber ta significa unda awa y biento ta encontra otro. Nan no lo contabo cu e melodia cu nos ta toca riba violin ta un continuacion di melodianan cu no pueblo tabata toca cu fluit, un tradicion sagrado cu ta honora y celebra bida di un hende na nan entiero, y cu ta un don di e Serpiente Plumá cu un strea, o ‘bola de fuego’, riba su cabes. Tambe, nan no lo contabo cu e bola de fuego ta guarda di mondi, tera, y pueblo, pero cu ambos tin presencia di spiritu malo cu ta imita un ‘bola de fuego’ pa asina ranca hende cay den un trampa unda cu un Curandero/a so por yuda e persona sana. Y cu e musica aki cual tambe ta sabiduria a continua den dicho particular y serka nan nos maneranan di k’Aketio.

Museo Arquelogico Nacional Aruba no ta representa e bida y storia di e k’Aketio y nos ancestronan cu ta floría di un fuente spiritual, connectá epoca tras di epoca. MANA cu su methodo arquologico y antropologico den collaboration cu scientifico Europeano pa determina un connexion entre prosupesto pre-ceramico y ceramico ta deshaci di curpa ancestral di nos grandinnan. E investigacion aki cu ta utiliza weso cu ta acuido per circumstancia cu ambos cas y caminda a wordo construi riba tereno ancestral, pero tambe wesonan acudí pa Arqueologico amateur. Ni 2 decada a pasa cu nan a cuminsa e proyecto di Arquelogia riba Aruba despue cu den 1862 e supesto delaster injan “puru” a fayece. Fragmentacionnan di weso cu aworaki ta wordo uza den un investigacion genetico unda lo bora den fragmentacion di e wesonan aki, cual pa tradicion ta conta cu ta causa sangramento di nanishi den descendiente. Un storia cu ta parti di nos origin ta conta di e peliger di loke ta un “curandero” cu a perde su alma, e la bira un creatura straño. Sin su Spiritu y connexion cu Creador y Creacion, e ta buska cualkier persona of animal sagrado pa uza nan weso pa maldicion, mientras esaki ta pasa otro bestianan lo cay of actua straño. Famianan affecta lo sangra di wowo, nanishi o orea. Loke ta Djuku, musica y articulonan sagrado cu bendishona pa un curandero/a ta proteha contra malo. Riba e topico di pre-ceramico y ceramic, mi persona como guarda di sabiduria ta bisando cu soño y tradicion ta conta cu no tin un differencia, y cu nos storia ta mas profundo cu loke a wordo declara pa MANA. Actualmente, e tradicion di musica a continua di prome cu e tempo “pre-ceramico”, te cu awendia. Den soñonan ta indica un connexion ancestral, unda rito di entiero tabata inclui musica como e manera principal pa carga e ceremonia, y cu e musica aki ta Sabiduria di Creador cual tin un curpa crea di music cu nos a bin di dje. E curpanan “pre-ceramico” tambe ta nos ancestronan.

Ta importante pa refleha cu eno tin daber di a sa of no sa di ambos e storia y tradicionan aki, pero pa nos mira con nos ta relaciona cu curpa nan ancestral cu a wordo hala di nan tumba y sosiego cu awor ta un obheto historico den arquelogia, continuamente bow e investigacion cu methodo scientifico pa determina un of algun ‘facto’ di dje… pero abase nan processo y interpretacion, y no e storia actual. E preguna pa nos refleha riba dje ta; “kiko e kiermen di nos principio, balor y relacion cu nos ancestronan si nan curpa ta un articulo di ambos arquelogia y sciencia, y no un ancestro cu a biba y muri, manera awe nos ta biba y muri?” Tin un chens pa por siña di desciendentenan bibo, pero mester refleha riba e tendencia di purba inculca sabiduria tradicional den ambos arqueologia y sciencia expanda nan conocemiento, embes di refleha riba posicion di e disciplinanan Europeano cu den e contexto aki ta misintepreta nos storia y pinta un pintura absente di e Spirito Bibo… E ta un pinta historia con e k’Aketio, Spirito Bibo, a devolucioná bira un curpa di weso den un museo cu interpretacion falso. Nan no lo, y no por, bisabo di nos origin. Si berdaderamente abo, descendiente, kier sa, tene pasenshi pa e siguente salida di solo riba e aña nobo. Como guarda di sabiduria, descendiente, cu a hereda tradicion y don di soño, mi ta avisa bo como desciendente pa keda pone attencion con den e siguente lunanan cu transpira lo bin varios intencion pa sigi quantifica nos den un pintura Eurocentrico. Dos prophecia k’Aketio cu a wordo reencontra den soño y intercambio di sabiduria ta expressa lo siguente:

1. "Ora Mama Tera regressa bek na su mes su curpa, e momento a yega” 2. "Nan lo purba ranka di nos den cualkier manera cu nos lo yega na accepta y lubida. Recordando ta brinda union den nos Spiritu, aki nos storia ta continua, den communion cu creacion. Prome cu nos union tuma lugar, lo tin varios atentado pa kibra nos di paden”. Milo avisa tambe cu varios aspecto no por wordo palabra, pasobra nan no por, of tambe, nan no kier. Nan no lo por pasobra nan no sa, esaki no ta nan culpa, pero tambe nan no por bisabo pasobra e ta tembla e fundishi di loke a wordo establesé; authoridad riba e herencia, nos storia, y e pintura contemporario cu a wordo pinta cu methodo di arquelogia y anthropologia. Mi intencion ta pa clarifica e diferencia entre loke ta tradicion y sabiduria cu e resucita di un memoria ancestral, cu esaki por inspira e institutonan y personnan indica pa refleha. Mi a bin pa corda mi ken ta mi como un descendiente, pa inspira abo pa asina bo tambe for corda ken bo ta, descendiente of no. Mi contabo mi storia y experiencia, cu mi soño, vision y reflexionnan a trecemi bek na mi mes, y cu a trecemi na encontra otro den bida. Mi ta conta mi storia, e berdadnan aki cu tabata y ainda ta, un dolor pa por culmina, pero ainda falta y lo nos profundisa nos mes mas. Tur cos tin su tempo. Como un k’Aketio, un Spirito Bibo, mi ta cordando mi bida, ken mi ta, regrasando den ceremonia unda e berdad ta nace di paden. Nos ta simbolonan di nos storia, tradicion, conocemiento y sabiduria. Pa sa of no sa algo no ta depende riba kiko bo ta wordo bisa of no bisa, pero sino loke bo ta sinti den e profundidad di bo Ser Spiritu… Un voz di paden, un sintimiento, cu ta guiabo riba bo caminda, te cu bo tambe sinti algun cos manera ami a sinti… Nos NO ta classificacion arquelogico, ni anthropologico, y nan no ta representa nos storia. Nos NO ta salvaje y primitivo. Nos NO ta falta di religion. Nos NO ta burachero y alcoholico, pero nos ta sufri di dje… Nos TA.. Yiunan di e Serpiente Plumá cu un strea, un ‘bola de fuego’, riba su cabes. Nos ta yuinan di e prome Muher sagrado cu su menstruacion a duna bida na tera, rooi, lama, luna, mundo, y henter bida. Nos ta yiunan di Creador cu a tuma e prome paso como e Solo saliendo di paden di den e mundo, e matris di e prome Muher Sagrado.

Nos ta Spirito Bibo cu a lubida ken nos ta, y e storia aki ta mas bieu cu tempo mes, ta di aki tempo a nace, e cyclonan a cuminsa. Ken nos ta den profundidad no tin palabra pa caba di expressa, pero un dia lo nos compronde. Mi ta comparti mi Sabiduria y conocemiento Tradicional, pero esaki ta simplemente e cuminsamento, y eta sumamente dificil pa palabrá tur aspecto. Mi ta simplemente conta mi storia. Bo no mester keremi. Tur hende por scohe pa nan mes, aunke no pa kies entre dos opcion predetermina, pero sino scohe di bo mes, e mester bin di abo.

Considera esaki; Con serio nos ta ricibi y reconoce author scholastico di Europa, di disciplinanan Europeo, cu methodo scientifico, pero cu nos no tin di nos mesun Ser un palabra pa bisa di nos storia como k’Aketio… te cu awor. E memoria ancestral ta roga pa wordo sintí, recordá y bibá di paden. Abo… descendiente k’Aketio, e spirito bibo drumí, ranká na raiz di tera, perdi den tempo, leeuw di bida y morto… Laga e voz paden di bo, e sinti cu algo kier lanta fe soño, treciendo bo bek na bo mes, na cas. Cordandbo BO cancion… bo baile… bo bida… k’Aketio

Te e siguente salida di luna y solo, Te e siguente aña nobo, Warda pa e berdad, Chayo.